| ᠱᠠᠭᠠ ᠨᠠᠭᠠᠳᠤᠮ ᠪᠣᠯ ᠮᠣᠩᠭᠤᠯᠴᠤᠳ ᠤᠨ ᠡᠷᠲᠡ ᠳᠡᠭᠡᠳᠦ ᠦᠶᠡ ᠠᠴᠠ ᠪᠠᠨ ᠥᠪᠯᠡᠵᠦ ᠢᠷᠡᠭᠰᠡᠨ | ᠵᠤᠭᠠ ᠴᠡᠩᠭᠡᠯ᠂ ᠲᠠᠮᠢᠷ ᠤᠷᠠᠯᠢᠭ ᠬᠤᠣᠰᠯᠠᠭᠰᠠᠨ ᠦᠨᠳᠦᠰᠦᠲᠠᠨ ᠤ ᠥᠪᠡᠷᠮᠢᠴᠠ ᠣᠨᠴᠠᠯᠢᠭ ᠲᠠᠢ᠂ ᠲᠡᠦᠬᠡᠲᠦ | ᠦᠨᠡ ᠥᠷᠲᠡᠭ ᠲᠠᠢ ᠰᠣᠳᠣᠨ ᠭᠠᠶᠢᠬᠠᠮᠰᠢᠭ ᠥᠪ ᠰᠣᠶᠣᠯ ᠶᠤᠮ᠃ ᠱᠠᠭᠠ ᠨᠠᠭᠠᠳᠤᠮ ᠨᠢ ᠠᠶᠢᠯ ᠠᠶᠢᠮᠠᠭ ᠤᠨ | ᠬᠠᠷᠢᠯᠴᠠᠭᠠ ᠶᠠᠪᠤᠯᠴᠠᠭᠠ ᠡᠪ ᠨᠠᠶᠢᠷ ᠢ ᠵᠤᠵᠠᠭᠠᠳᠬᠠᠵᠤ ᠠᠬᠠ ᠳᠡᠭᠦᠦ ᠠᠨᠳᠠ ᠨᠠᠶᠢᠵᠠ ᠶᠢᠨ ᠤᠷᠮᠠ ᠪᠠᠬᠠ ᠶᠢ | ᠰᠡᠷᠭᠦᠭᠡᠵᠦ᠂ ᠤᠬᠠᠭᠠᠨ ᠰᠠᠨᠠᠭᠠ ᠶᠢ ᠰᠠᠷᠠᠭᠤᠯᠵᠢᠭᠤᠯᠵᠤ᠂ ᠤᠷᠠᠨ ᠰᠡᠳᠬᠢᠮᠵᠢ ᠶᠢ ᠬᠥᠭᠵᠢᠭᠡᠳᠡᠭ᠂ ᠨᠠᠰᠤᠲᠠᠨ | ᠨᠢᠯᠬᠠ ᠢᠯᠭᠠᠯ ᠦᠭᠡᠢ ᠨᠠᠭᠠᠳᠳᠠᠭ ᠠᠮᠢᠳᠤᠷᠠᠯ ᠳᠤ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠬᠠᠪᠤ ᠴᠡᠩᠭᠡᠯ ᠢ ᠣᠯᠭᠤᠳᠠᠭ ᠣᠯᠠᠨ | ᠲᠦᠮᠡᠨᠴᠢ ᠲᠠᠮᠢᠷ ᠤᠷᠠᠯᠢᠭ ᠤᠨ ᠲᠣᠭᠯᠠᠭᠠᠮ ᠶᠤᠮ᠃ ᠪᠡᠶᠢᠰᠡ ᠶᠢᠨ ᠰᠥᠮᠡ ᠪᠣᠯ ᠤᠤᠯ ᠤᠨ ᠠᠪᠠᠭᠠᠨᠠᠷ | ᠬᠤᠰᠢᠭᠤᠨ ᠤ ᠤᠯᠤᠰ ᠲᠥᠷᠥ᠂ ᠠᠵᠤ ᠠᠬᠤᠢ᠂ ᠰᠣᠶᠣᠯ ᠰᠤᠷᠭᠠᠨ ᠬᠦᠮᠦᠵᠢᠯ᠂ ᠲᠠᠮᠢᠷ ᠤᠷᠠᠯᠢᠭ ᠤᠨ ᠲᠥᠪ | ᠪᠠᠶᠢᠭᠰᠠᠨ ᠪᠣᠯᠬᠤᠷ ᠪᠡᠶᠢᠰᠡ ᠶᠢᠨ ᠰᠥᠮᠡ ᠶᠢᠨ ᠮᠠᠮᠠ ᠨᠠᠷ ᠤᠨ ᠱᠠᠭᠠ ᠨᠢᠰᠠᠯᠬᠤ ᠶᠣᠰᠤ ᠭᠤᠷᠢᠮ ᠨᠢ ᠴᠦ ᠤᠤᠯ | ᠤᠨ ᠠᠪᠠᠭᠠᠨᠠᠷ ᠬᠤᠰᠢᠭᠤᠨ ᠤ ᠣᠳᠣ ᠶᠢᠨ ᠰᠢᠯᠢᠩᠬᠤᠲᠠ ᠶᠢᠨ ᠱᠠᠭᠠ ᠨᠢᠰᠠᠯᠭᠠ ᠶᠢᠨ ᠭᠤᠣᠯ ᠴᠢᠮᠦᠭᠡ ᠪᠣᠯᠬᠤ | ᠶᠣᠰᠣᠲᠠᠢ ᠮᠥᠷᠲᠡᠭᠡᠨ ᠮᠥᠨᠴᠤ ᠣᠳᠣ ᠶᠢᠨ ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠤᠨ ᠱᠠᠭᠠ ᠨᠢᠰᠠᠯᠭᠠ ᠶᠢᠨ ᠲᠥᠪ ᠣᠷᠣᠨ | ᠪᠣᠯᠬᠤ ᠶᠣᠰᠣᠲᠠᠢ᠃ ᠪᠡᠶᠢᠰᠡ ᠶᠢᠨ ᠰᠥᠮᠡ ᠶᠢᠨ ᠮᠠᠮᠠ ᠨᠠᠷ ᠤᠨ ᠳᠣᠲᠤᠷᠠ ᠱᠠᠭᠠ ᠰᠠᠶᠢᠨ ᠨᠢᠰᠠᠯᠳᠠᠭ ᠮᠠᠮᠠ ᠨᠠᠷ | ᠣᠯᠠᠨ ᠪᠠᠶᠢᠯᠠ ᠭᠡᠵᠤ ᠨᠠᠰᠤᠲᠠᠶᠢᠴᠤᠤᠯ ᠬᠠᠭᠤᠴᠢᠯᠠᠵᠤ ᠪᠠᠶᠢᠨᠠ᠂ ᠣᠳᠣ ᠶᠢᠨ ᠰᠢᠯᠢᠨᠬᠤᠲᠠ ᠶᠢᠨ ᠪᠣᠯᠭᠠᠨ ᠰᠤᠮᠤᠨ ᠤ | ᠰᠢᠷᠠᠲᠠᠯᠠ ᠭᠠᠴᠠᠭᠠᠨ ᠤ ᠨᠠᠶᠠᠨ ᠭᠡᠳᠤᠲᠠᠢ ᠵᠢᠪᠵᠢᠮᠠ ᠡᠵᠢ ᠶᠠᠷᠢᠬᠤ ᠳᠠᠭᠠᠨ᠄ ︿︿ᠴᠣᠶᠢᠷᠠᠪ᠂ ᠨᠢᠩᠵᠢᠳ᠂ | ᠵᠠᠮᠢᠶᠠᠨᠵᠢᠮᠪᠢ ᠨᠠᠷ ᠪᠣᠯ ᠵᠢᠷᠠᠨ ᠱᠠᠭᠠ ᠶᠢ ᠨᠢᠭᠡ ᠡᠭᠡᠯᠵᠢᠨ ᠳᠤ ᠬᠠᠷᠪᠤᠭᠠᠳ ᠪᠠᠷᠠᠴᠢᠬᠠᠳᠠᠭ ᠰᠠᠶᠢᠨ ᠬᠠᠷᠪᠤᠭᠠᠴᠢ | ᠪᠠᠶᠢᠭᠰᠠᠨ﹀﹀ ᠭᠡᠵᠤ ᠬᠠᠭᠤᠴᠢᠯᠠᠵᠤ ᠪᠠᠶᠢᠯᠠ᠃ ᠬᠠᠷᠠᠮᠰᠠᠯᠲᠠᠢ ᠨᠢ ᠲᠡᠳᠡᠭᠡᠷ ᠰᠣᠳᠣ ᠬᠦᠮᠦᠰ ᠤᠨ ᠢᠶᠠᠨ ᠨᠢᠰᠠᠯᠬᠤ | ᠠᠷᠭᠠ ᠮᠡᠷᠭᠡᠵᠢᠯ᠂ ᠤᠬᠠᠭᠠᠨ ᠰᠠᠮᠪᠠᠭᠠ ᠶᠢ ᠨᠢ ᠰᠤᠷᠴᠦ ᠡᠵᠡᠮᠰᠢᠵᠤ ᠠᠪᠤᠭᠰᠠᠨ ᠬᠦᠮᠦᠨ ᠲᠤᠩ ᠴᠥᠬᠡᠨ ᠪᠠᠶᠢᠵᠠᠢ᠃ | ᠨᠡᠩ ᠴᠦ ᠳᠡᠭᠡᠷᠡ ᠵᠠᠭᠤᠨ ᠤ ᠲᠠᠪᠢ ᠵᠢᠷᠠᠭᠠᠳ ᠣᠨ ᠳᠤ ᠲᠡᠤᠬᠡ ᠶᠢᠨ ᠣᠯᠠᠨ ᠵᠦᠢᠯ ᠤᠨ ᠰᠢᠯᠲᠠᠭᠠᠨ ᠠᠴᠠ ᠪᠣᠯᠵᠤ | ᠰᠠᠭᠠ ᠲᠣᠭᠯᠠᠭᠠᠮ ᠨᠠᠭᠠᠳᠳᠠᠭ ᠬᠦᠮᠦᠨ ᠲᠤᠩ ᠴᠥᠬᠡᠷᠡᠭᠰᠡᠨ ᠪᠠᠶᠢᠯᠠ᠃ ᠳᠡᠭᠡᠷᠡ ᠵᠠᠭᠤᠨ ᠤ ᠨᠠᠶᠠ ᠶᠡᠷᠡᠭᠡᠳ ᠣᠨ | ᠭᠡᠬᠦ ᠳᠤ ᠬᠠᠷᠢᠨ ᠨᠡᠯᠢᠶᠡᠳ ᠨᠠᠭᠠᠳᠬᠤ ᠪᠠᠶᠢᠳᠠᠯ ᠲᠠᠢ ᠪᠣᠯᠣᠭᠰᠠᠨ ᠪᠠᠶᠢᠨᠠ᠃ ᠱᠠᠭᠠ ᠲᠣᠭᠯᠠᠭᠠᠮ ᠳᠤ ᠣᠯᠠᠨ ᠵᠦᠢᠯ | ᠪᠠᠶᠢᠳᠠᠭ ᠮᠥᠷᠲᠡᠭᠡᠨ ᠭᠠᠵᠠᠷ ᠭᠠᠵᠠᠷ ᠤᠨ ᠨᠠᠭᠠᠳᠬᠤ ᠠᠷᠭᠠ ᠬᠡᠯᠪᠡᠷᠢ ᠠᠰ ᠠᠰᠳᠠᠭᠠᠨ᠂ ᠲᠥᠷᠥᠯ ᠵᠦᠢᠯ ᠴᠦ | ᠣᠨᠳᠣᠣ ᠣᠨᠳᠣᠣ ᠪᠠᠶᠢᠳᠠᠭ ᠪᠠᠶᠢᠨᠠ᠃ ᠰᠢᠯᠢ ᠶᠢᠨ ᠬᠤᠲᠠ ᠳᠤ ᠰᠢᠬᠠ ᠬᠠᠷᠪᠤᠬᠤ᠂ ᠱᠠᠭᠠ ᠨᠢᠰᠠᠯᠬᠤ᠂ ᠳᠣᠯᠣᠭᠠᠨ | ᠳᠤᠭᠤᠢ ᠨᠠᠭᠠᠳᠬᠤ᠂ ᠱᠠᠭᠠ ᠲᠠᠭᠠᠯᠴᠠᠬᠤ᠂ ᠮᠥᠩᠬᠦᠵᠢᠬᠦ①᠂ ᠮᠣᠷᠢ ᠤᠷᠤᠯᠳᠤᠬᠤ᠂ ᠰᠢᠨᠡ ᠵᠢᠯ ᠰᠢᠨᠡ ᠶᠢᠨ | ᠨᠢᠭᠡᠨ ᠳᠤ ᠠᠷᠪᠠᠨ ᠭᠤᠷᠪᠠᠨ ᠮᠣᠷᠢ ᠱᠠᠭᠠ ᠪᠠᠷ ᠬᠡᠶᠢᠮᠣᠷᠢ ᠰᠢᠨᠵᠢᠬᠦ ᠵᠡᠷᠭᠡ ᠨᠠᠭᠠᠳᠤᠮ ᠢ ᠢᠯᠡᠭᠦᠦ ᠰᠢᠭ ᠨᠠᠭᠠᠳᠳᠠᠭ | ᠪᠠᠶᠢᠨᠠ᠃ ᠨᠠᠰᠤᠲᠠᠶᠢᠴᠤᠳ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ ᠳᠡᠭᠡᠷᠡ ᠵᠠᠭᠤᠨ ᠤ ᠳᠥᠴᠢ ᠲᠠᠪᠢᠭᠠᠳ ᠣᠨ ᠳᠤ ᠣᠨᠣᠳᠠᠭ ᠢ | ︵ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠰᠡᠮᠪᠡᠭ ᠭᠡᠳᠡᠭ︶ ᠪᠠᠰᠠ ᠨᠠᠭᠠᠳᠴᠤ ᠪᠠᠶᠢᠵᠡᠢ᠃ ᠱᠠᠭᠠ ᠨᠢᠰᠠᠯᠬᠤ ᠪᠣᠯ ᠱᠠᠭᠠ | ᠲᠣᠭᠯᠠᠭᠠᠮ ᠤᠨ ᠨᠠᠭᠠᠳᠤᠮ ᠤᠨ ᠳᠤᠮᠳᠠᠬᠢ ᠨᠢᠭᠡ ᠬᠢᠯᠠᠰ ᠴᠢᠭ ᠪᠠᠶᠢᠬᠤ ᠶᠣᠰᠣᠲᠠᠢ᠃ ᠤᠴᠢᠷ ᠨᠢ ᠱᠠᠭᠠ | ᠨᠢᠰᠠᠯᠬᠤ ᠳᠤ ᠤᠬᠠᠭᠠᠨ ᠰᠠᠮᠪᠠᠭᠠ᠂ ᠤᠷᠠᠨ ᠬᠠᠷᠪᠤᠯᠭᠠ ᠠᠴᠠ ᠭᠠᠳᠠᠨᠠ ᠱᠠᠭᠠ ᠣᠷᠬᠢᠬᠤ ᠭᠠᠷ ᠤᠨ ᠳᠡᠮ ᠪᠠᠰᠠ | ᠶᠡᠭᠡ ᠪᠠᠷ ᠱᠠᠭᠠᠷᠳᠠᠭᠳᠠᠨᠠ᠃ ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠤᠨ ᠤᠤᠯ ᠤᠨ ᠠᠪᠠᠭᠠᠨᠠᠷ ᠬᠤᠰᠢᠭᠤ ᠪᠤᠯᠤᠨ᠋ | ᠪᠡᠶᠢᠰᠡ ᠶᠢᠨ ᠰᠥᠮᠡ ᠶᠢᠨ ᠮᠠᠮᠠ ᠨᠠᠷ ᠤᠨ ᠱᠠᠭᠠ ᠨᠢᠰᠠᠯᠬᠤ ᠶᠣᠰᠣ ᠭᠤᠷᠢᠮ᠂ ᠳᠥᠷᠢᠮ ᠲᠣᠭᠲᠠᠭᠠᠯ ᠲᠤᠩ ᠴᠢᠩᠭᠠ | ᠂ ᠰᠣᠨᠢᠨ ᠰᠡᠪᠡᠭᠦᠨ ᠪᠠᠶᠢᠳᠠᠭ ᠪᠣᠯᠬᠤᠷ ᠠᠳᠡ ᠪᠢ ᠡᠳᠡᠭᠡᠷ ᠢ ᠨᠠᠷᠢᠨ ᠨᠢᠮᠪᠠᠢ ᠰᠡᠶᠢᠷᠡᠭᠦᠯᠵᠦ᠂ ᠲᠠ ᠪᠦᠬᠦᠨ ᠳᠤ | ᠲᠣᠯᠢᠯᠠᠭᠤᠯᠬᠤ ᠳᠤ ᠤᠷᠮᠠ ᠲᠠᠢ ᠪᠠᠶᠢᠨᠠ᠃ | ᠭᠥᠯᠢᠮ ᠳᠡᠭᠡᠷᠡ ᠱᠠᠭᠠ ᠨᠢᠰᠠᠯᠬᠤ ᠶᠣᠰᠤ ᠭᠤᠷᠢᠮ | ᠭᠥᠯᠢᠮ ᠳᠡᠭᠡᠷᠡ ᠨᠠᠭᠠᠳᠬᠤ ᠶᠢᠨ ᠤᠴᠢᠷ᠃ ᠪᠡᠶᠢᠰᠡ ᠶᠢᠨ ᠰᠥᠮᠡ ᠶᠢᠨ ᠮᠠᠮᠠ ᠨᠠᠷ ᠱᠠᠭᠠ ᠶᠢ ᠭᠥᠯᠢᠮ | ᠳᠡᠭᠡᠷᠡ ᠨᠢᠰᠠᠯᠵᠤ ᠨᠠᠭᠠᠳᠳᠠᠭ ᠤᠯᠠᠮᠵᠢᠯᠠᠯ ᠲᠠᠢ᠃ ᠡᠭᠦᠨ ᠳᠤ ᠬᠠᠮᠤᠭ ᠤᠨ ᠲᠡᠷᠢᠭᠦᠨ ᠳᠤ ᠵᠠᠪᠠᠯ ᠲᠡᠭᠰᠢ | ᠲᠥᠷᠪᠡᠯᠵᠢᠨ ᠭᠥᠯᠢᠮ ᠪᠠᠶᠢᠬᠤ ᠬᠡᠷᠡᠭᠲᠡᠢ᠃ ᠡᠨᠡ ᠭᠥᠯᠢᠮ ᠨᠢ ᠵᠠᠪᠠᠯ ᠴᠢᠨᠠᠷᠯᠢᠭ ᠪᠤᠯᠢᠭᠠᠷᠢ ᠭᠥᠯᠢᠮ ᠮᠥᠷᠲᠡᠭᠡᠨ | ᠭᠥᠯᠢᠭᠡᠷ᠂ ᠨᠠᠷᠢᠯᠢᠭ᠂ ᠲᠠᠯᠠ ᠶᠢᠨ ᠤᠷᠲᠤ ᠨᠢ ᠳᠥᠴᠢᠨ ᠰᠡᠨᠲ᠋ᠢᠮᠧᠲᠷ ᠣᠷᠴᠢᠮ ᠤᠨ ᠲᠡᠭᠰᠢ ᠳᠥᠷᠪᠡᠯᠵᠢᠨ ᠭᠥᠯᠢᠮ | ᠪᠠᠶᠢᠪᠠᠯ ᠬᠠᠮᠤᠭ ᠤᠨ ᠵᠣᠬᠢᠮᠵᠢᠲᠠᠢ᠃ ᠭᠥᠯᠢᠮ ᠨᠢ ᠤᠶᠠᠨ ᠵᠥᠭᠡᠯᠡᠨ ᠮᠥᠷᠲᠡᠭᠡᠨ ᠭᠤᠯᠭᠤᠯᠲᠠ ᠶᠢᠨ ᠬᠦᠴᠦ ᠲᠡᠶᠢᠮᠦ | ᠶᠡᠭᠡ ᠪᠢᠰᠢ ᠱᠠᠭᠠ ᠣᠷᠬᠢᠬᠤ ᠳᠤ ᠵᠦᠭ ᠦᠭᠡᠢ ᠲᠦᠷᠭᠡᠨ ᠪᠤᠲᠠᠷᠠᠵᠦ ᠶᠠᠪᠤᠬᠤ ᠦᠬᠡᠢ᠂ ᠡᠪ ᠲᠠᠢ ᠳᠡᠮ ᠲᠠᠢ | ᠤᠷᠬᠢᠪᠠᠯ ᠬᠥᠨᠳᠡᠭᠡ ᠪᠠᠭᠤᠬᠤ ᠦᠬᠡᠢ ᠵᠡᠷᠭᠡ ᠰᠠᠶᠢᠨ ᠲᠠᠯᠠ ᠲᠠᠢ ᠪᠠᠶᠢᠳᠠᠭ᠃ ᠢᠢᠮᠦ ᠭᠥᠯᠢᠮ ᠳᠡᠭᠡᠷᠡ ᠵᠢᠷᠠᠨ ᠱᠠᠭᠠ | ᠣᠷᠬᠢᠭᠠᠳ ᠬᠠᠮᠤᠭ ᠠᠷᠪᠢᠨ ᠳᠤ ᠪᠠᠨ ᠵᠢᠷᠭᠤᠭᠠᠨ ᠱᠠᠭᠠ ᠯᠡ ᠭᠦᠯᠢᠮ ᠤᠨ ᠭᠠᠳᠠᠨᠠ ᠤᠨᠠᠬᠤ ᠶᠢ ᠵᠥᠪᠰᠢᠶᠡᠷᠡᠳᠡᠭ | ᠮᠥᠷᠳᠡᠭᠡᠨ ᠬᠥᠨᠳᠡᠭᠡ ᠲᠠᠢ ᠣᠷᠬᠢᠬᠤ ᠶᠢ ᠵᠥᠪᠰᠢᠶᠡᠷᠡᠳᠡᠭ ᠦᠭᠡᠢ᠃ | ᠭᠦᠯᠢᠮ ᠳᠡᠭᠡᠷᠡ ᠱᠠᠭᠠ ᠣᠷᠬᠢᠬᠤ ᠳᠤ ᠱᠠᠭᠠ ᠣᠷᠬᠢᠬᠤ ᠬᠦᠮᠥᠨ ᠤ ᠭᠠᠷ ᠤᠨ ᠳᠡᠮ ᠨᠢᠳᠥᠨ ᠬᠠᠷᠠᠴᠠ᠂ | ᠠᠷᠭᠠ ᠤᠬᠠᠭᠠᠨ᠂ ᠵᠣᠷᠢᠭ ᠲᠡᠪᠴᠢᠶᠡᠷᠢ ᠭᠦᠢᠴᠡᠳ ᠲᠦᠪᠯᠡᠷᠡᠭᠦᠯᠬᠦ ᠦᠭᠡᠢ ᠪᠣᠯ ᠵᠢᠷᠭᠤᠭᠠ ᠠᠴᠠ ᠢᠯᠡᠭᠦᠥ ᠱᠠᠭᠠ | ᠭᠦᠯᠢᠮ ᠤᠨ ᠭᠠᠳᠠᠨᠠ ᠤᠨᠠᠴᠢᠬᠠᠵᠤ ᠮᠡᠳᠡᠨᠠ᠂ ᠡᠰᠡᠭᠦᠯᠡ ᠬᠥᠨᠳᠡᠭᠡ ᠲᠠᠢ ᠣᠷᠬᠢᠴᠢᠬᠠᠵᠦ ᠮᠡᠳᠡᠨᠡ᠂ ᠬᠥᠨᠳᠡᠭᠡ | ᠦᠭᠡᠢ ᠮᠥᠷᠲᠡᠭᠡᠨ ᠭᠥᠯᠢᠮ ᠤᠨ ᠭᠠᠳᠠᠨᠠ ᠵᠢᠷᠭᠤᠭᠠ ᠠᠴᠠ ᠢᠯᠡᠭᠦᠥ ᠱᠠᠭᠠ ᠤᠨᠠᠭᠠᠬᠤ ᠦᠭᠡᠢ ᠪᠠᠶᠢᠳᠠᠯ ᠤᠨ | ᠳᠣᠣᠷᠠ ᠰᠠᠶ᠋ᠢ ᠱᠠᠭᠠ ᠣᠷᠭᠢᠭᠰᠠᠨ ᠬᠦᠮᠦᠨ ᠣᠷᠬᠢᠭᠰᠠᠨ ᠱᠠᠭᠠ ᠪᠠᠨ ᠨᠢᠰᠠᠯᠵᠦ ᠪᠣᠯᠣᠨᠠ᠃ ᠭᠥᠯᠢᠮ ᠢ | ᠬᠠᠳᠠᠭᠠᠯᠠᠵᠤ ᠬᠠᠮᠠᠭᠠᠯᠠᠬᠤ ᠠᠷᠭᠠ᠃ ᠱᠠᠭᠠ ᠨᠢᠰᠠᠯᠬᠤ ᠳᠤ ᠭᠦᠯᠢᠮ ᠨᠢ ᠲᠤᠲᠠᠭᠲᠠᠵᠤ ᠪᠣᠯᠣᠰᠢ ᠦᠭᠡᠢ ᠴᠢᠬᠤᠯᠠ | ᠪᠠᠭᠠᠵᠢ ᠨᠢ ᠪᠣᠯᠬᠤ ᠶᠣᠰᠣᠲᠠᠢ᠃ ᠬᠥᠯᠢᠮ ᠢ ᠠᠷᠠᠴᠢᠯᠠᠵᠤ ᠳᠣᠳᠣᠮᠳᠠᠬᠤ ᠳᠤ ᠠᠷᠪᠢᠨ ᠠᠷᠭᠠ ᠪᠠᠶᠢᠳᠠᠭ᠃ | ᠶᠠᠭᠤᠨ ᠤ ᠡᠮᠦᠨᠡ ᠭᠦᠯᠢᠮ ᠢ ᠬᠠᠯᠠᠭᠤᠨ ᠨᠠᠷᠠᠨ ᠳᠤ ᠬᠠᠭᠰᠠᠭᠠᠵᠤ ᠬᠠᠲᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠴᠢᠬᠢᠭ | ᠨᠣᠶᠢᠲᠠᠨ ᠭᠠᠵᠠᠷ ᠤᠳᠠᠭᠠᠨ ᠬᠠᠶᠠᠵᠤ ᠴᠢᠬᠢᠭᠳᠡᠵᠦ ᠬᠤᠷᠣᠬᠠᠶᠢᠳᠠᠬᠤ ᠠᠴᠠ ᠰᠡᠷᠭᠡᠶᠢᠯᠡᠬᠦ ᠬᠡᠷᠡᠭᠲᠡᠢ᠃ ᠬᠥᠯᠢᠮ ᠢ | ᠭᠥᠯᠢᠭᠡᠷ ᠨᠠᠷᠢᠯᠢᠭ ᠪᠠᠶᠢᠯᠭᠠᠬᠤ ᠳᠤ ᠭᠥᠯᠢᠮ ᠨᠤᠭᠤᠰᠤᠯᠠᠬᠤ ᠭᠡᠵᠤ ᠨᠢᠭᠡ ᠨᠠᠷᠢᠨ ᠠᠵᠢᠯ ᠪᠠᠶᠢᠳᠠᠭ᠃ ᠭᠥᠯᠢᠮ | ᠨᠤᠭᠤᠰᠤᠯᠠᠬᠤ ᠭᠡᠳᠡᠭ ᠨᠢ ᠰᠠᠶ᠋ᠢ ᠨᠢᠲᠤᠯᠠᠭᠰᠠᠨ ᠬᠤᠨᠢᠨ ᠤ ᠨᠢᠷᠤᠭᠤᠨ ᠤ ᠨᠤᠭᠤᠰᠤ ᠶᠢ ︵ᠲᠦᠭᠦᠬᠡᠢ ᠦᠶᠡ ᠳᠤ ᠨᠢ︶ | ᠬᠠᠯᠢᠰᠤᠨ ᠠᠴᠠ ᠨᠢ ᠰᠢᠬᠠᠵᠤ ᠭᠠᠷᠭᠠᠨ᠂ ᠨᠤᠭᠤᠰᠤᠨ ᠤ ᠨᠠᠷᠢᠨ ᠰᠢᠷᠬᠡᠭ ᠢ ᠨᠢ ᠵᠡᠭᠦᠦ ᠪᠠᠷ ᠰᠡᠨᠳᠡᠶᠢᠯᠡᠨ ᠠᠪᠴᠤ | ᠬᠠᠶᠠᠭᠠᠳ ᠨᠤᠭᠤᠰᠤ ᠪᠠᠨ ᠬᠥᠯᠢᠮ ᠳᠡᠭᠡᠷᠡ ᠪᠠᠨ ᠳᠦᠷᠬᠢᠵᠤ ᠵᠥᠭᠡᠯᠡᠨ ᠱᠤᠸᠠᠰᠠ ᠪᠠᠷ ᠵᠢᠭᠳᠡ ᠱᠤᠸᠠᠰᠠᠳᠠᠵᠤ ᠨᠠᠷᠠ | ᠰᠢᠭᠤᠳ ᠲᠤᠰᠬᠤ ᠦᠭᠡᠢ ᠰᠡᠷᠢᠭᠦᠨ ᠭᠠᠵᠠᠷ ᠲᠡᠭᠰᠢᠬᠡᠨ ᠲᠠᠯᠪᠢᠵᠤ᠂ ᠬᠠᠲᠠᠭᠰᠠᠨ ᠤ ᠳᠠᠷᠠᠭᠠ ᠵᠥᠭᠡᠯᠡᠨ ᠪᠥᠰ ᠢᠶᠠᠷ | ᠲᠠᠬᠢᠨ ᠲᠠᠬᠢᠨ ᠵᠦᠯᠭᠦᠵᠦ ᠭᠥᠯᠢᠭᠡᠷ ᠭᠢᠯᠠᠭᠠᠷ ᠪᠣᠯᠭᠠᠬᠤ ᠶᠢ ᠬᠡᠯᠡᠨᠡ᠃ | ᠭᠥᠯᠢᠮ ᠳᠡᠭᠡᠷᠡ ᠱᠠᠭᠠ ᠨᠢᠰᠠᠯᠬᠤ ᠶᠣᠰᠤ ᠭᠤᠷᠢᠮ᠃ ᠡᠬᠢᠯᠡᠵᠦ ᠨᠠᠭᠠᠳᠬᠤ ᠳᠠᠭᠠᠨ ᠬᠤᠶᠠᠷ ᠬᠦᠮᠦᠨ ᠤ | ᠬᠡᠨ ᠨᠢ ᠤᠷᠢᠳᠠᠪᠠᠷ ᠱᠠᠭᠠ ᠨᠢᠰᠠᠯᠬᠤ ᠡᠷᠬᠡ ᠶᠢ ᠣᠯᠬᠤ ᠪᠠᠨ ᠪᠠᠰᠠ ᠨᠠᠷᠢᠨ ᠲᠤᠳᠣᠷᠬᠠᠢ ᠳᠣᠭᠲᠠᠭᠠᠭᠰᠠᠨ ᠪᠠᠶᠢᠳᠠᠭ᠃ | ᠡᠭᠦᠨ ᠳᠤ ᠱᠠᠭᠠ ᠨᠠᠭᠠᠳᠬᠤ ᠬᠤᠶᠠᠷ ᠬᠦᠮᠦᠨ ᠲᠤᠰ ᠲᠣᠰ ᠬᠤᠶᠠᠷ ᠱᠠᠭᠠ ᠠᠳᠬᠤᠵᠦ᠂ ᠨᠠᠰᠤᠨ ᠤ | ᠠᠬᠠᠮᠠᠳ ᠠᠴᠠ ᠨᠢ ᠡᠬᠢᠯᠡᠵᠦ ᠪᠥᠩᠵᠢᠭ ②ᠤᠷᠬᠢᠵᠦ᠂ ᠤᠷᠢᠳᠠᠪᠡᠷ ᠢᠵᠢᠯ ᠪᠤᠰᠬᠠᠭᠰᠠᠨ ᠡᠲᠡᠭᠡᠳ ᠨᠢ ᠵᠢᠷᠠᠨ | ᠱᠠᠭᠠ ᠶᠢ ᠡᠬᠢᠯᠡᠵᠦ ᠣᠷᠬᠢᠵᠦ ᠨᠢᠰᠠᠯᠬᠤ ᠡᠷᠬᠡ ᠶᠢ ᠣᠯᠣᠨᠠ᠃ ᠢᠩᠭᠢᠭᠡᠳ ᠰᠠᠶ᠋ᠢ ᠡᠬᠢᠯᠡᠵᠤ ᠨᠠᠭᠠᠳᠬᠤ ᠡᠷᠬᠡ | ᠣᠯᠣᠭᠰᠠᠨ ᠡᠲᠡᠭᠡᠳ ᠨᠢ ᠱᠠᠭᠠ ᠪᠠᠨ ᠭᠥᠯᠢᠮ ᠳᠡᠭᠡᠷᠡ ᠣᠷᠬᠢᠨᠠ᠃ ᠱᠠᠭᠠ ᠨᠢᠰᠠᠯᠬᠤ ᠤᠯᠠᠮᠵᠢᠯᠠᠯᠲᠤ ᠶᠤᠰᠤ | ᠭᠤᠷᠢᠮ ᠳᠤ ᠠᠷᠪᠠᠭᠠᠳ ᠵᠦᠢᠯ ᠪᠠᠶᠢᠳᠠᠭ᠃ ᠠᠳᠡ ᠪᠢ ᠵᠥᠪᠬᠡᠨ ᠵᠢᠷᠠᠨ ᠱᠠᠭᠠ ᠨᠢᠰᠠᠯᠬᠤ ᠳᠥᠷᠢᠮ ᠢ | ᠲᠠᠨᠢᠯᠴᠠᠭᠤᠯᠤᠶᠡ᠃ ᠨᠢᠰᠠᠯᠬᠤ ᠱᠠᠭᠠ ᠶᠢᠨ ᠲᠣᠭᠠᠨ ᠤ ᠬᠤᠪᠢᠷᠠᠯᠲᠠ ᠠᠴᠠ ᠪᠣᠯᠵᠤ ᠳᠥᠷᠢᠮ ᠨᠢ ᠪᠠᠰᠠ ᠵᠠᠷᠢᠮ | ᠬᠤᠪᠢᠷᠠᠯᠲᠠ ᠭᠠᠷᠤᠨᠠ᠃ | ᠵᠢᠱᠢᠶᠡᠯᠡᠪᠡᠯ᠄ ᠵᠢᠷᠠ ᠠᠴᠠ ᠵᠢᠷᠭᠤᠭᠠ᠂ ᠭᠤᠴᠢ ᠠᠴᠠ ᠭᠤᠷᠪᠠ ᠭᠡᠵᠤ ᠶᠠᠷᠢᠳᠠᠭ᠃ | ᠨᠢᠭᠡ ᠳᠤ᠂ ᠵᠢᠷᠠᠨ ᠱᠠᠭᠠ ᠠᠴᠠ ᠭᠦᠯᠢᠮ ᠤᠨ ᠭᠠᠳᠠᠨᠠ ᠵᠢᠷᠭᠤᠭᠠ ᠤᠨᠠᠬᠤ ︵1-6︶ ᠳᠤ ᠪᠣᠯᠣᠨᠠ᠂ | ᠳᠣᠯᠤᠭᠠ ᠤᠨᠠᠪᠠᠯ ᠳᠥᠷᠢᠮ ᠳᠤ ᠨᠡᠶᠢᠴᠡᠬᠦ ᠦᠭᠡᠢ ᠪᠣᠯᠵᠤ ᠨᠥᠭᠦᠭᠡ ᠡᠲᠡᠭᠡᠳ ᠤᠨ ᠡᠭᠡᠯᠵᠢ ᠪᠣᠯᠣᠨᠠ᠃ | ᠭᠦᠯᠢᠮ ᠤᠨ ᠬᠥᠪᠡᠭᠡᠨ ᠳᠠᠬᠢ ᠱᠠᠭᠠ ᠶᠢ ᠰᠢᠯᠭᠠᠬᠤ ᠳᠠᠭᠠᠨ ᠭᠦᠯᠢᠮ ᠤᠨ ᠢᠷᠮᠡᠭ ᠢ ᠡᠷᠭᠦᠵᠦ ᠲᠣᠭᠲᠠᠭᠠᠨᠠ᠃ ᠡᠨᠡ | ᠨᠢ ᠳᠠᠷᠤᠢ ᠨᠥᠭᠦᠭᠡ ᠡᠲᠡᠭᠡᠳ ᠨᠢ ᠭᠦᠯᠢᠮ ᠤᠨ ᠢᠷᠮᠡᠭ ᠢ ᠬᠥᠩᠭᠡᠬᠡᠨ ᠡᠷᠭᠦᠵᠦ ᠦᠵᠡᠬᠦ ᠳᠤ ᠱᠠᠭᠠ ᠭᠦᠯᠢᠮ | ᠳᠡᠭᠡᠷᠡ ᠪᠠᠨ ᠲᠣᠭᠲᠠᠵᠤ ᠪᠠᠶᠢᠪᠠᠯ ᠭᠦᠯᠢᠮ ᠳᠡᠭᠡᠷᠡᠬᠢ ᠱᠠᠭᠠ ᠪᠠᠷ ᠪᠣᠳᠣᠵᠤ᠂ ᠭᠠᠳᠠᠭᠰᠢ ᠪᠠᠨ ᠤᠨᠠᠪᠠᠯ ᠭᠦᠯᠢᠮ ᠤᠨ | ᠭᠠᠳᠠᠨᠠ ᠣᠶᠢᠴᠢᠭᠰᠠᠨ ᠢᠶᠠᠷ ᠪᠣᠳᠣᠨᠠ᠃ | ᠬᠤᠶᠠᠷ ᠲᠤ᠂ ᠢᠵᠢᠯ ᠱᠠᠭᠠ ᠪᠠᠨ ᠨᠢᠰᠠᠯᠤᠭᠰᠠᠨ ᠤ ᠳᠠᠷᠠᠭᠠ ᠨᠢᠭᠡ ᠶᠢ ᠨᠢ ᠠᠪᠤᠨᠠ᠂ ᠵᠠᠩᠭᠠᠵᠤ③ | ᠪᠣᠯᠬᠤ ᠦᠭᠡᠢ᠃ ᠱᠠᠭᠠ ᠨᠢᠰᠠᠯᠤᠭᠰᠠᠨ ᠭᠠᠷ ᠢᠶᠠᠷ ᠨᠢᠰᠠᠯᠤᠭᠰᠠᠨ ᠱᠠᠭᠠ ᠪᠠᠨ ᠠᠪᠴᠤ ᠪᠣᠯᠬᠤ ᠦᠭᠡᠢ᠂ ᠱᠠᠭᠠ ᠲᠠᠢ | ᠭᠠᠷ ᠢᠶᠠᠷ ᠱᠠᠭᠠ ᠠᠪᠴᠤ ᠪᠣᠯᠬᠤ ᠦᠭᠡᠢ᠂ ᠱᠠᠭᠠ ᠨᠢᠰᠠᠯᠬᠤ ᠪᠣᠶᠤ ᠨᠢᠰᠠᠯᠤᠭᠰᠠᠨ ᠱᠠᠭᠠ ᠪᠠᠨ ᠠᠪᠬᠤ ᠳᠤ ᠪᠠᠨ | ᠬᠥᠨᠳᠡᠵᠤ④ ᠪᠣᠯᠬᠤ ᠦᠭᠡᠢ᠃ | ᠭᠤᠷᠪᠠ ᠳᠤ᠂ ᠭᠠᠵᠠᠷ ᠤᠨᠠᠭᠰᠠᠨ ᠱᠠᠭᠠ ᠶᠢ ᠨᠥᠭᠦᠭᠡ ᠡᠲᠡᠭᠡᠳ ᠠᠪᠴᠤ ᠭᠦᠯᠢᠮ ᠳᠡᠭᠡᠷᠡ ᠣᠷᠬᠢᠵᠤ | ᠥᠭᠭᠦᠨᠡ᠂ ᠱᠠᠭᠠ ᠣᠷᠬᠢᠭᠰᠠᠨ ᠬᠦᠮᠦᠨ ᠥᠪᠡᠷ ᠢᠶᠠᠨ ᠭᠠᠷ ᠬᠦᠷᠴᠦ ᠪᠣᠯᠬᠤ ᠦᠭᠡᠢ᠂ ᠣᠶᠢᠴᠢᠭᠰᠠᠨ ᠱᠠᠭᠠ ᠶᠢ | ᠣᠷᠬᠢᠵᠤ ᠥᠭᠬᠦ ᠳᠡᠭᠡᠨ ᠬᠥᠨᠳᠡᠭᠡ⑤ ᠲᠠᠢ ᠣᠷᠬᠢᠵᠤ ᠥᠭᠴᠦ ᠪᠣᠯᠬᠤ ᠦᠭᠡᠢ᠂ ᠭᠦᠯᠢᠮ ᠤᠨ ᠵᠠᠢ ᠶᠢ ᠦᠵᠡᠵᠦ | ᠣᠷᠬᠢᠵᠤ ᠥᠭᠬᠦ ᠬᠡᠷᠡᠭᠲᠡᠢ᠂ ᠣᠯᠠᠨ ᠱᠠᠭᠠ ᠶᠢᠨ ᠳᠤᠮᠳᠠ ᠡᠷᠦᠢ ᠬᠤᠷᠣᠢ ᠦᠭᠡᠢ ᠰᠢᠳᠡᠵᠤ ᠬᠠᠶᠠᠵᠤ ᠥᠭᠴᠦ | ᠪᠣᠯᠬᠤ ᠦᠭᠡᠢ᠃ | ᠳᠥᠷᠪᠡ ᠳᠤ᠂ ᠬᠤᠶᠠᠷ ᠡᠲᠡᠭᠡᠳ ᠢᠶᠠᠷ ᠢᠶᠠᠨ ᠨᠠᠷᠢᠨ ᠨᠢᠮᠪᠠᠢ ᠪᠠᠶᠢᠴᠠᠭᠠᠵᠤ᠂ ᠬᠥᠨᠳᠡᠭᠡ ᠪᠠᠶᠢᠬᠤ ᠦᠭᠡᠢ ᠪᠣᠯ | ᠡᠬᠢᠯᠡᠵᠦ ᠨᠢᠰᠠᠯᠵᠤ ᠪᠣᠯᠣᠨᠠ᠃ ᠬᠥᠨᠳᠡᠭᠡ ᠲᠠᠢ ᠪᠣᠯ ᠨᠥᠭᠦᠭᠡ ᠡᠲᠡᠭᠡᠳ ᠰᠢᠭᠤᠳ ᠬᠤᠷᠢᠶᠠᠵᠤ ᠠᠪᠤᠨᠠ᠂ | ᠲᠡᠭᠦᠨ ᠤ ᠡᠭᠡᠯᠵᠢ ᠪᠤᠯᠤᠨᠠ᠃ ᠬᠥᠨᠳᠡᠭᠡ ᠲᠠᠲᠠᠬᠤ ᠳᠤ ᠰᠢᠭᠤᠳ ᠭᠠᠷ ᠢᠶᠠᠷ ᠢᠶᠠᠨ ᠲᠠᠲᠠᠵᠤ ᠪᠤᠯᠠᠬᠤ ᠦᠭᠡᠢ᠂ | ᠵᠠᠪᠠᠯ ᠵᠡᠭᠦᠦ ᠪᠤᠶᠤ ᠰᠢᠳᠤᠨ ᠴᠢᠬᠢᠵᠢᠭᠦᠷ ᠢᠶᠠᠷ ᠲᠠᠲᠠᠬᠤ ᠭᠡᠷᠡᠭᠲᠡᠢ᠃ ᠨᠠᠭᠠᠯᠳᠤᠭᠰᠠᠨ ᠬᠤᠶᠠᠷ ᠱᠠᠭᠠ ᠠᠯᠢ ᠨᠢ ᠴᠦ | ᠭᠡᠰᠡᠨ ᠪᠠᠭᠠ ᠯᠠ ᠬᠥᠳᠡᠯᠪᠡᠯ ᠳᠠᠷᠤᠢ ᠬᠥᠨᠳᠡᠭᠡ ᠲᠠᠢ ᠳᠤ ᠲᠣᠭᠠᠴᠠᠭᠳᠠᠨᠠ᠃ | ᠲᠠᠪᠦ ᠳᠤ᠂ ᠬᠥᠨᠳᠡᠭᠡ ᠲᠠᠲᠠᠭᠰᠠᠨ ᠪᠣᠶᠣ ᠭᠠᠵᠠᠷ ᠣᠶᠢᠴᠢᠭᠰᠠᠨ ᠱᠠᠭᠠ ᠠᠴᠠ ᠡᠬᠢᠯᠡᠵᠤ ᠨᠢᠰᠠᠯᠵᠤ ᠪᠣᠯᠬᠤ | ᠦᠭᠡᠢ᠃ ᠵᠢᠷᠭᠤᠭᠠᠨ ᠱᠠᠭᠠ ᠨᠢᠰᠠᠯᠤᠭᠰᠠᠨ ᠤ ᠳᠠᠷᠠᠭᠠ ᠰᠠᠶ᠋ᠢ ᠡᠳᠡᠭᠡᠷ ᠱᠠᠭᠠ ᠶᠢ ᠨᠢᠰᠠᠯᠵᠤ ᠪᠣᠯᠬᠤ ᠮᠦᠷᠲᠡᠭᠡᠨ | ᠪᠠᠰᠠ ᠭᠦᠯᠢᠮ ᠢ ᠡᠬᠢᠯᠡᠵᠤ ᠬᠥᠳᠡᠯᠭᠡᠵᠦ ᠡᠷᠭᠢᠭᠦᠯᠵᠦ ᠪᠣᠯᠣᠨᠠ᠃ ᠭᠡᠬᠦ ᠳᠡᠭᠡᠨ ᠭᠦᠯᠢᠮ ᠢᠶᠠᠨ ᠵᠥᠪ ᠡᠷᠭᠢᠭᠦᠯᠦᠨᠡ᠂ | ᠬᠠᠮᠤᠭ ᠰᠠᠶᠢᠨ ᠨᠢ ᠭᠦᠯᠢᠮ ᠡᠷᠭᠢᠭᠦᠯᠬᠦ ᠦᠭᠡᠢ ᠪᠣᠯ ᠰᠠᠶᠢᠨ᠂ ᠬᠤᠶᠠᠷ ᠭᠠᠷ ᠢᠶᠠᠷ ᠢᠶᠠᠨ ᠡᠭᠡᠯᠵᠢᠯᠡᠨ ᠨᠢᠰᠠᠯᠪᠠᠯ | ᠭᠦᠯᠢᠮ ᠡᠷᠭᠢᠭᠦᠯᠬᠦ ᠣᠴᠢᠷ ᠳᠡᠮᠡᠢ ᠭᠠᠷᠳᠠᠭ ᠦᠭᠡᠢ᠂ ᠱᠠᠭᠠ ᠨᠢᠰᠠᠯᠬᠤ ᠳᠠᠭᠠᠨ ᠣᠷᠣᠨ ᠠᠴᠠ ᠪᠠᠨ ᠬᠥᠳᠡᠯᠵᠤ | ᠪᠣᠯᠳᠠᠭ ᠦᠭᠡᠢ᠃ | ᠵᠢᠷᠭᠤᠭᠠ ᠳᠤ᠂ ᠡᠬᠢᠯᠡᠵᠥ ᠱᠠᠭᠠ ᠨᠢᠰᠠᠯᠤᠭᠰᠠᠨ ᠬᠦᠮᠦᠨ ᠠᠷᠪᠠᠨ ᠱᠠᠭᠠ ᠭᠠᠷ ᠲᠤ ᠪᠠᠨ ᠠᠪᠤᠭᠰᠠᠨ ᠤ | ᠳᠠᠷᠠᠭᠠ ᠰᠠᠶ᠋ᠢ ᠭᠠᠷ ᠲᠠᠬᠢ ᠱᠠᠭᠠ ᠪᠠᠨ ᠬᠠᠵᠠᠭᠤ ᠳᠤ ᠪᠠᠨ ᠲᠠᠯᠪᠢᠵᠤ ᠭᠠᠷ ᠠᠴᠠ ᠪᠠᠨ ᠰᠠᠯᠭᠠᠵᠤ ᠪᠤᠯᠤᠨᠠ᠂ | ᠠᠷᠪᠠᠨ ᠱᠠᠭᠠ ᠠᠪᠬᠤ ᠠᠴᠠ ᠡᠮᠦᠨᠡ ᠠᠪᠤᠭᠰᠠᠨ ᠱᠠᠭᠠ ᠪᠠᠨ ᠭᠠᠷ ᠠᠴᠠ ᠪᠠᠨ ᠰᠠᠯᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠬᠡᠷᠪᠡ | ᠠᠷᠪᠠᠨ ᠱᠠᠭᠠ ᠠᠪᠬᠤ ᠠᠴᠠ ᠡᠮᠦᠨᠡ ᠳᠥᠷᠢᠮ ᠵᠥᠷᠢᠴᠡᠬᠦ ᠪᠣᠶᠤ ᠨᠢᠰᠠᠯᠵᠤ ᠲᠡᠶᠢᠯᠦᠭᠰᠡᠨ ᠦᠭᠡᠢ ᠪᠣᠯ ᠨᠢᠰᠠᠯᠵᠤ | ᠠᠪᠤᠭᠰᠠᠨ ᠱᠠᠭᠠ ᠪᠤᠯᠤᠨ ᠭᠥᠯᠢᠮ ᠳᠡᠭᠡᠷᠡᠬᠢ ᠱᠠᠭᠠ ᠪᠠᠨ ᠪᠦᠬᠦᠨ ᠢ ᠨᠥᠭᠦᠭᠡ ᠡᠲᠡᠭᠡᠳ ᠳᠤ ᠪᠠᠨ ᠦᠭᠭᠦᠨᠡ᠃ | ᠳᠣᠯᠤᠭᠠ ᠳᠤ᠂ ᠣᠷᠬᠢᠭᠰᠠᠨ ᠱᠠᠭᠠ ᠨᠢ ᠪᠥᠭᠦᠳᠡ ᠢᠵᠢᠯ ᠪᠣᠯ ᠨᠥᠭᠦᠭᠡ ᠡᠲᠡᠭᠡᠳ ᠪᠤᠯᠢᠶᠠᠵᠤ ᠪᠣᠯᠬᠤ | ᠦᠭᠡᠢ᠂ ᠣᠷᠬᠢᠭᠰᠠᠨ ᠬᠦᠮᠦᠨ ᠥᠪᠡᠷ ᠢᠶᠠᠨ ᠪᠠᠰᠠ ᠬᠤᠷᠢᠶᠠᠵᠤ ᠠᠪᠴᠤ ᠪᠣᠯᠬᠤ ᠦᠭᠡᠢ᠂ ᠵᠠᠪᠠᠯ ᠨᠢᠰᠠᠯᠵᠤ | ᠪᠠᠷᠠᠭᠠᠨᠠ᠃ ᠵᠠᠷᠢᠮ ᠭᠠᠵᠠᠷ ᠵᠠᠷᠢᠮ ᠦᠶᠡ ᠳᠤ ᠪᠠᠰᠠ ᠨᠠᠰᠤ ᠬᠤᠷᠠᠭ ᠤᠨ ᠵᠠᠯᠠᠭᠤᠴᠤᠳ ᠨᠠᠭᠠᠳᠤᠮ ᠳᠤ ᠨᠠᠷᠭᠢᠶᠠᠨ | ᠨᠡᠮᠡᠵᠦ ᠢᠵᠢᠯ ᠪᠤᠰᠤᠭᠰᠠᠨ ᠱᠠᠭᠠ ᠶᠢ ᠪᠤᠯᠢᠶᠠᠯᠴᠠᠬᠤ ᠶᠠᠪᠤᠳᠠᠯ ᠵᠥᠩᠳᠡᠬᠡᠨ ᠭᠠᠷᠳᠠᠭ ᠪᠠᠶᠢᠨᠠ᠃ | ᠨᠠᠢᠮᠠ ᠳᠤ᠂ ᠱᠠᠭᠠ ᠬᠠᠷᠪᠤᠬᠤ ᠳᠤ ᠭᠠᠷ ᠤᠨ ᠲᠣᠬᠤᠢ ᠪᠠᠨ ᠬᠥᠳᠡᠯᠭᠡᠵᠦ ᠪᠣᠯᠬᠤ ᠦᠭᠡᠢ᠂ ᠵᠥᠪᠬᠡᠨ | ᠬᠤᠷᠤᠭᠤ ᠬᠥᠳᠡᠯᠦᠨᠡ᠂ ᠭᠡᠬᠦ ᠳᠡᠭᠡᠨ ᠳᠣᠯᠣᠪᠦᠷ ᠬᠤᠷᠤᠭᠤ ᠪᠠᠷ ᠨᠢᠰᠠᠯᠵᠤ ᠪᠣᠯᠬᠤ ᠦᠭᠡᠢ᠂ ᠨᠢᠰᠠᠯᠵᠤ ᠪᠣᠯᠬᠤ | ᠦᠭᠡᠢ ᠭᠡᠳᠡᠭ ᠨᠢ ᠮᠣᠩᠭᠤᠯ ᠬᠦᠮᠦᠨ ᠶᠡᠷᠦ ᠨᠢ ᠳᠣᠯᠣᠪᠣᠷ ᠬᠤᠷᠤᠭᠤ ᠶᠢ ᠬᠤᠬᠢᠮᠠᠢ ᠶᠢᠨ ᠬᠤᠷᠤᠭᠤ ᠭᠡᠳᠡᠭ ᠲᠠᠢ | ᠬᠤᠯᠪᠤᠭᠠ ᠲᠠᠢ᠃ ᠲᠠᠲᠠᠵᠤ᠂ ᠲᠦᠯᠬᠢᠵᠦ᠂ ᠭᠤᠬᠠᠳᠠᠵᠤ᠂ ᠡᠲᠦᠵᠤ ᠪᠣᠯᠬᠤ ᠦᠭᠡᠢ᠂ ᠳᠠᠭᠠᠭᠠᠵᠤ ᠪᠣᠯᠬᠤ ᠦᠭᠡᠢ᠃ | ᠳᠠᠭᠠᠭᠠᠬᠤ ᠭᠡᠳᠡᠭ ᠨᠢ᠂ ᠵᠢᠱᠢᠶᠡᠯᠡᠪᠡᠯ᠂ ᠬᠤᠶᠠᠷ ᠢᠮᠠᠭᠠᠨ ᠤ ᠳᠤᠮᠳᠠ ᠨᠢᠭᠡ ᠮᠣᠷᠢ ᠪᠠᠶᠢᠨᠠ᠂ ᠡᠨᠡ ᠬᠤᠶᠠᠷ | ᠢᠮᠠᠭᠠ ᠶᠢ ᠰᠢᠭᠤᠳ ᠨᠢᠰᠠᠯᠵᠤ ᠳᠡᠶᠢᠯᠬᠦ ᠦᠭᠡᠢ᠂ ᠡᠨᠡ ᠦᠶᠡ ᠳᠤ ᠨᠢᠭᠡ ᠢᠮᠠᠭᠠᠨ ᠤ ᠪᠠᠨ ᠨᠢᠷᠤᠭᠤᠨ ᠳᠡᠭᠡᠷᠡ | ᠡᠷᠡᠭᠡᠢ ᠬᠤᠷᠤᠭᠤ ᠪᠠᠷ ᠢᠶᠠᠨ ᠬᠦᠴᠦᠲᠡᠢ ᠳᠠᠷᠤᠵᠤ᠂ ᠬᠤᠷᠤᠭᠤ ᠲᠠᠢ ᠪᠠᠨ ᠨᠠᠭᠠᠯᠳᠤᠭᠤᠯᠵᠤ ᠪᠠᠶᠢᠭᠠᠳ ᠮᠣᠷᠢᠨ ᠤ | ᠳᠡᠭᠡᠭᠦᠷ ᠬᠡᠢ ᠭᠠᠷᠭᠠᠵᠤ᠂ ᠨᠥᠭᠦᠭᠡ ᠢᠮᠠᠭᠠᠨ ᠳᠡᠭᠡᠷᠡ ᠪᠠᠨ ᠣᠨᠣᠭᠠᠬᠤ ᠶᠢ ᠬᠡᠯᠡᠨᠡ᠃ | ᠶᠢᠰᠦ ᠳᠤ᠂ ᠬᠤᠶᠠᠷ ᠱᠠᠭᠠ ᠶᠢ ᠨᠢᠰᠠᠯᠤᠭᠰᠠᠨ ᠤ ᠳᠠᠷᠠᠭᠠ᠂ ᠨᠢᠭᠡ ᠨᠢ ᠭᠦᠯᠢᠮ ᠳᠡᠭᠡᠷᠡ ᠪᠠᠨ | ᠦᠯᠡᠳᠡᠵᠤ᠂ ᠨᠢᠭᠡ ᠨᠢ ᠭᠦᠯᠢᠮ ᠤᠨ ᠭᠠᠳᠠᠨᠠ ᠭᠠᠷᠪᠠᠯ ᠭᠥᠯᠢᠮ ᠤᠨ ᠭᠠᠳᠠᠨᠠ ᠣᠶᠢᠴᠢᠭᠰᠠᠨ ᠢ ᠲᠡᠭᠦᠵᠦ ᠠᠪᠤᠨᠠ᠂ | ᠭᠦᠯᠢᠮ ᠳᠡᠭᠡᠷᠡ ᠪᠠᠶᠢᠭᠠ ᠱᠠᠭᠠ ᠪᠠᠨ ᠠᠪᠴᠤ ᠪᠣᠯᠬᠤ ᠦᠭᠡᠢ᠂ ᠨᠢᠰᠠᠯᠤᠭᠰᠠᠨ ᠬᠤᠶᠠᠷ ᠱᠠᠭᠠ ᠬᠤᠶᠠᠭᠤᠯᠠ ᠪᠠᠨ | ᠭᠦᠯᠢᠮ ᠤᠨ ᠭᠠᠳᠠᠨᠠ ᠭᠠᠷᠪᠠᠯ᠂ ᠳᠥᠷᠢᠮ ᠵᠥᠷᠢᠴᠡᠭᠰᠡᠨ ᠳᠤ ᠲᠤᠭᠠᠴᠠᠭᠳᠠᠨᠠ᠃ ᠭᠡᠶᠡ ᠰᠥᠮᠡ ᠶᠢᠨ ᠮᠠᠮᠠ ᠨᠠᠷ | ᠪᠣᠯ ᠬᠠᠷᠢᠨ ᠣᠶᠢᠴᠢᠭᠰᠠᠨ ᠬᠤᠶᠠᠷ ᠱᠠᠭᠠ ᠶᠢᠨ ᠠᠯᠢ ᠨᠢ ᠬᠡᠷᠡᠭᠴᠡᠭᠡ ᠲᠠᠢ ᠶᠠᠭᠤᠮᠠ ᠨᠢ ︵ᠳᠠᠷᠤᠢ ᠮᠣᠷᠢ ᠲᠡᠮᠡᠭᠡ | ᠬᠤᠨᠢ ᠢᠮᠠᠭᠠ︶ ᠪᠣᠯᠣᠭᠰᠠᠨ ᠪᠠᠶᠢᠪᠠᠯ ᠲᠡᠷᠡ ᠶᠢ ᠪᠠᠨ ᠬᠥᠯᠢᠮ ᠳᠡᠭᠡᠷᠡ ᠲᠠᠯᠪᠢᠭᠤᠯᠵᠤ ᠵᠠᠯᠭᠠᠨ ᠨᠠᠭᠠᠳᠳᠠᠭ ᠪᠠᠶᠢᠨᠠ | ᠃ ᠡᠨᠡ ᠲᠠᠯᠠ ᠪᠠᠷ ᠰᠥᠮᠡ ᠶᠢᠨ ᠨᠠᠭᠠᠳᠤᠮ ᠤᠨ ᠳᠥᠷᠢᠮ ᠨᠢ ᠵᠢᠭᠠᠬᠠᠨ ᠰᠤᠯᠠ ᠰᠢᠭ᠋ ᠪᠠᠶᠢᠳᠠᠭ ᠪᠠᠶᠢᠨᠠ᠃ ᠡᠭᠦᠨ ᠢ | ᠰᠢᠯᠢᠨᠬᠤᠲᠠ ᠶᠢᠨ ᠪᠠᠶᠠᠨᠪᠤᠯᠠᠭ ᠰᠤᠮᠤᠨ ᠤ ᠪᠠᠷᠬᠠᠰᠤᠸᠠᠳᠢ ᠨᠠᠰᠤᠲᠠᠨ ᠨᠠᠳᠠ ᠳᠤ ᠶᠠᠷᠢᠭᠰᠠᠨ ᠪᠢᠯᠡ᠃ | ᠠᠷᠪᠠ ᠳᠤ᠂ ᠬᠠᠮᠤᠭ ᠰᠡᠭᠦᠯ ᠳᠤ ᠬᠤᠶᠠᠷᠬᠠᠨ ᠱᠠᠭᠠ ᠦᠯᠡᠳᠡᠭᠰᠡᠨ ᠦᠶᠡ ᠳᠤ ᠱᠠᠭᠠ ᠪᠠᠶᠢᠬᠤ ᠦᠭᠡᠢ | ᠬᠦᠮᠦᠨ ᠢᠵᠢᠯ ᠣᠷᠬᠢᠪᠠᠯ ᠠᠷᠪᠢᠨ ᠱᠠᠭᠠ ᠲᠠᠢ ᠬᠦᠮᠦᠨ ᠨᠢ ᠬᠤᠶᠠᠷ ᠱᠠᠭᠠ ᠭᠠᠷᠭᠠᠵᠤ ᠦᠷᠭᠦᠯᠵᠢᠯᠡᠨ ᠨᠠᠭᠠᠳᠤᠨᠠ᠃ | ᠠᠷᠪᠢᠨ ᠱᠠᠭᠠ ᠲᠠᠢ ᠬᠦᠮᠦᠨ ᠨᠢ ᠢᠵᠢᠯ ᠣᠷᠬᠢᠪᠠᠯ ᠢᠵᠢᠯ ᠣᠷᠭᠢᠭᠰᠠᠨ ᠬᠤᠶᠠᠷ ᠱᠠᠭᠠ ᠪᠠᠨ ᠨᠢᠰᠠᠯᠵᠤ᠂ ᠨᠥᠭᠦᠭᠡ | ᠡᠲᠡᠭᠡᠳ ᠢᠶᠠᠨ ᠢᠯᠠᠨᠠ᠂ ᠵᠠᠷᠢᠮ ᠦᠶᠡ ᠳᠤ ᠪᠠᠰᠠ ᠪᠡᠶᠡ ᠪᠡᠶᠡ ᠪᠠᠨ ᠬᠤᠷᠣᠰᠬᠠᠵᠤ᠂ ᠰᠢᠬᠡᠵᠢ ᠬᠤᠷᠤᠭᠤ ᠪᠠᠷ ᠢᠶᠠᠨ | ᠨᠢᠰᠠᠯᠬᠤ ᠴᠦ ᠪᠣᠢ᠃ | ᠱᠠᠭᠠ ᠪᠠᠷ ᠪᠥᠩᠵᠢᠭ ᠣᠷᠬᠢᠬᠤ ᠪᠠ ᠣᠪᠣᠭᠠ ᠳᠠᠬᠢᠬᠤ | ᠪᠥᠩᠵᠢᠭ ᠣᠷᠬᠢᠬᠤ ᠦᠶᠡ ᠳᠤ ᠬᠡᠷᠪᠡ ᠢᠵᠢᠯ ᠮᠣᠷᠢ ᠪᠣᠰᠪᠠᠯ ᠬᠡᠶᠢᠮᠣᠷᠢ ᠵᠢᠪᠬᠤᠭᠠ ᠲᠠᠢ ᠪᠠᠶᠢᠨᠠ ᠭᠡᠵᠤ | ᠶᠡᠭᠡ ᠯᠠ ᠪᠡᠯᠭᠡᠰᠢᠶᠡᠵᠤ ᠪᠠᠶᠢᠳᠠᠭ᠃ ᠵᠠᠷᠢᠮ ᠭᠠᠵᠠᠷ ᠣᠷᠬᠢᠭᠰᠠᠨ ᠠᠷᠪᠢᠨ ᠱᠠᠭᠠ ᠶᠢᠨ ᠳᠣᠮᠳᠠ ᠠᠴᠠ ᠡᠬᠢᠯᠡᠵᠤ | ᠨᠢᠰᠠᠯᠬᠤ ᠠᠴᠠ ᠪᠠᠨ ᠡᠮᠦᠨᠡ ᠮᠣᠷᠢ ᠪᠣᠰᠤᠭᠰᠠᠨ ᠱᠠᠭᠠ ᠪᠠᠨ ᠳᠡᠭᠦᠵᠦ ᠠᠪᠳᠠᠭ᠃ ᠮᠠᠨ ᠤ ᠠᠳᠡ ᠳᠡᠭᠡᠳᠡᠭ ᠦᠭᠡᠢ᠃ | ᠠᠷᠪᠢᠨ ᠮᠣᠷᠢ ᠪᠣᠰᠣᠭᠰᠠᠨ ᠪᠠᠶᠢᠪᠠᠯ ᠬᠡᠶᠢᠮᠣᠷᠢ ᠲᠠᠢ ᠪᠠᠶᠢᠨᠠ ᠭᠡᠵᠤ ᠱᠠᠭᠠ ᠨᠢᠰᠠᠯᠬᠤ ᠬᠦᠮᠦᠨ ᠵᠣᠷᠢᠭ ᠵᠣᠯᠪᠤᠭᠠ | ᠲᠠᠢ ᠪᠣᠯᠵᠤ᠂ ᠦᠵᠡᠵᠤ ᠬᠠᠷᠠᠵᠤ ᠪᠠᠶᠢᠭᠠ ᠬᠦᠮᠦᠰ ᠴᠦ ︿︿ ᠪᠣᠯᠵᠤ ᠪᠠᠶᠢᠨᠠ᠂ ᠠᠵᠠ ᠲᠠᠢ ᠪᠠᠶᠢᠨᠠ᠂ ᠢᠯᠠᠬᠤ | ᠶᠤᠮ ᠪᠠᠶᠢᠨᠠ﹀﹀ ᠭᠡᠵᠤ ᠤᠷᠮᠠ ᠬᠠᠶᠢᠷᠠᠯᠠᠳᠠᠭ᠃ ᠣᠷᠬᠢᠬᠤ ᠠᠷᠪᠢᠨ ᠱᠠᠭᠠ ᠶᠢᠨ ᠳᠤᠮᠳᠠ ᠠᠴᠠ ᠭᠡᠯᠲᠡᠩ ᠲᠡᠮᠡᠭᠡ | ᠪᠣᠶᠣ ᠭᠡᠯᠲᠡᠩ ᠮᠣᠷᠢ ᠭᠠᠷᠳᠠᠭ᠃ ᠡᠨᠡ ᠦᠶᠡ ᠳᠤ ᠨᠠᠭᠠᠳᠴᠤ ᠪᠠᠶᠢᠭᠠ ᠨᠥᠭᠦᠭᠡ ᠡᠲᠡᠭᠡᠳ ᠨᠢ ᠭᠦᠯᠢᠮ ᠳᠡᠭᠡᠷᠡ | ᠭᠡᠯᠲᠡᠩ ᠲᠡᠮᠡᠭᠡ ᠭᠡᠯᠲᠡᠩ ᠮᠣᠷᠢᠨ ᠤ ᠬᠠᠵᠠᠭᠤ ᠳᠤ ᠬᠥᠩᠭᠡᠬᠡᠨ ᠭᠤᠷᠪᠠ ᠲᠣᠭᠰᠢᠨᠠ᠂ ᠬᠡᠷᠪᠡ ᠤᠨᠠᠬᠤ ᠦᠭᠡᠢ ᠪᠣᠯ | ᠭᠡᠯᠳᠡᠩ ᠲᠡᠮᠡᠭᠡ ᠪᠣᠯ ᠲᠡᠮᠡᠭᠡ ᠪᠠᠷ ᠨᠢ ᠪᠣᠳᠣᠨᠠ᠂ ᠭᠡᠯᠳᠡᠩ ᠮᠣᠷᠢ ᠪᠣᠯ ᠮᠣᠷᠢ ᠪᠠᠷ ᠪᠣᠳᠣᠨᠠ᠂ ᠤᠨᠠᠪᠠᠯ ᠬᠤᠨᠢ | ᠢᠮᠠᠭᠠᠨ ᠤ ᠠᠯᠢ ᠨᠢ ᠲᠤᠰᠪᠠᠯ ᠠᠯᠢ ᠪᠠᠷ ᠨᠢ ᠪᠣᠳᠣᠳᠠᠭ᠂ ᠪᠠᠰᠠ ᠣᠷᠬᠢᠭᠰᠠᠨ ᠣᠯᠠᠨ ᠱᠠᠭᠠ ᠶᠢᠨ ᠳᠤᠮᠳᠠ ᠠᠴᠠ | ᠳᠡᠭᠡᠷᠡ ᠳᠡᠭᠡᠷᠡ ᠪᠠᠨ ᠳᠠᠪᠬᠤᠷᠯᠠᠵᠤ ᠪᠠᠭᠤᠭᠰᠠᠨ ᠢ ᠣᠪᠣᠭᠠ ᠭᠡᠵᠣ ᠂ ᠣᠪᠣᠭᠠ ᠳᠠᠬᠢᠬᠤ ᠦᠢᠯᠡ ᠬᠥᠳᠡᠯᠭᠡᠭᠡᠨ | ᠶᠠᠪᠤᠭᠳᠠᠳᠠᠭ᠃ ᠱᠠᠭᠠ ᠣᠷᠬᠢᠭᠰᠠᠨ ᠬᠦᠮᠦᠨ ᠤ ᠨᠥᠭᠦᠭᠡ ᠡᠲᠡᠭᠡᠳ ᠨᠢ ᠨᠢᠭᠡᠳᠦᠭᠡᠷ ᠲᠤ ᠮᠣᠷᠢ ᠠᠪᠴᠤ ᠲᠠᠬᠢᠳᠠᠭ᠂ | ᠢᠯᠡᠭᠦᠦ ᠱᠠᠭᠠ ᠬᠤᠨᠵᠢᠬᠤ ᠶᠢᠨ ᠲᠤᠯᠠᠳᠠ᠂ ᠣᠪᠣᠭᠠᠨ ᠠᠴᠠ ᠵᠠᠶᠢᠲᠠᠢ ᠰᠢᠭ᠋ ᠣᠷᠬᠢᠳᠠᠭ᠂ ︵ᠣᠪᠣᠭᠠᠨ ᠤ | ᠬᠠᠵᠠᠭᠤᠬᠠᠨ ᠳᠤ ᠣᠷᠬᠢᠪᠠᠯ ᠲᠣᠷᠭᠢᠯᠲᠠ ᠠᠴᠠ ᠪᠣᠯᠵᠤ ᠣᠪᠣᠭᠠ ᠨᠤᠷᠠᠴᠢᠬᠠᠪᠠᠯ ᠣᠪᠣᠭᠠ ᠳᠠᠬᠢᠭᠰᠠᠨ ᠬᠦᠮᠦᠨ | ᠭᠠᠭᠴᠠ ᠯᠠ ᠱᠠᠭᠠ ᠬᠤᠨᠵᠢᠬᠤ ᠪᠢᠰᠢ ᠦᠦ︶ ᠬᠤᠶᠠᠷ᠂ ᠭᠤᠷᠪᠠᠳᠤᠭᠠᠷ ᠲᠤ ᠲᠡᠮᠡᠭᠡ ᠬᠤᠨᠢ᠂ ᠢᠮᠠᠭᠠ ᠠᠯᠢᠨ ᠨᠢ | ᠴᠦ ᠪᠣᠯᠣᠨᠠ᠂ ᠣᠪᠣᠭᠠᠨ ᠤ ᠣᠷᠴᠢᠮ ᠣᠷᠬᠢᠵᠤ᠂ ᠭᠤᠷᠪᠠᠳᠤᠭᠠᠷ ᠲᠤ ᠵᠠᠪᠠᠯ ᠣᠪᠣᠭᠠ ᠶᠢ ᠨᠢ ᠪᠠᠭᠤᠯᠭᠠᠵᠤ | ᠥᠭᠭᠦᠭᠰᠡᠨ ᠪᠠᠶᠢᠬᠤ ᠬᠡᠷᠡᠭᠲᠡᠢ᠃ ᠱᠠᠭᠠ ᠨᠢᠰᠠᠯᠬᠤ ᠨᠢ ᠨᠠᠰᠤ ᠵᠢᠯ ᠤᠨ ᠬᠢᠵᠠᠭᠠᠷᠯᠠᠯ ᠦᠭᠡᠢ ᠵᠡᠷᠭᠡ ᠬᠡᠷᠬᠢᠮ ᠤᠨ | ᠢᠯᠭᠠᠯ ᠦᠭᠡᠢ ᠨᠠᠭᠠᠳᠳᠠᠭ ᠨᠠᠭᠠᠳᠤᠮ ᠪᠤᠯᠬᠤᠷ ᠶᠡᠭᠡ ᠯᠠ ᠬᠥᠭᠵᠢᠶᠡᠨ ᠲᠠᠢ ᠮᠥᠷᠲᠡᠭᠡᠨ ᠠᠲᠠᠭᠠ ᠵᠦᠲᠡᠭᠡ ᠲᠠᠢ | ᠪᠠᠶᠢᠳᠠᠭ ᠶᠤᠮ ᠪᠠᠶᠢᠨᠠ᠂ ᠡᠨᠡ ᠲᠤᠬᠠᠢ ᠲᠠᠢ ᠣᠳᠣ ᠶᠢᠨ ᠪᠠᠶᠠᠨᠪᠤᠯᠠᠭ ᠰᠤᠮᠤᠨ ᠤ ᠪᠠᠷᠬᠠᠰᠤᠸᠠᠳᠢ ᠨᠠᠰᠤᠲᠠᠨ | ᠬᠡᠯᠡᠬᠦ ᠳᠡᠭᠡᠨ ᠪᠡᠶᠢᠰᠡ ᠶᠢᠨ ᠰᠥᠮᠡ ᠶᠢᠨ ᠬᠠᠶᠢᠮᠴᠤᠭ ᠭᠡᠳᠡᠭ ᠳ᠋ᠠ ᠯᠠᠮᠠ ᠴᠠᠭᠠᠨ ᠰᠠᠷᠠ ᠶᠢᠨ ᠱᠠᠭᠠ | ᠨᠠᠭᠠᠳᠤᠮ ᠢᠶᠠᠷ ᠢᠶᠠᠨ ᠵᠢᠭᠠᠬᠠᠨ ᠱᠠᠪᠢ ᠳᠠᠭᠠᠨ ᠱᠦᠭᠦᠭᠳᠡᠵᠡᠢ᠂ ᠴᠠᠭᠠᠨ ᠰᠠᠷᠠ ᠥᠩᠭᠡᠷᠡᠵᠤ ᠬᠤᠷᠠᠯ ᠬᠤᠷᠠᠵᠤ ᠨᠣᠮ | ᠬᠠᠶᠠᠯᠴᠠᠬᠤ ᠪᠣᠯᠬᠤ ᠳᠤ ᠥᠨᠥ ᠵᠢᠭᠠᠬᠠᠨ ᠱᠠᠪᠢ ᠨᠢ ᠰᠤᠷᠤᠭᠰᠠᠨ ᠨᠣᠮ ᠢᠶᠠᠨ ᠮᠠᠷᠲᠠᠴᠢᠬᠠᠵᠠᠢ᠂ ᠬᠠᠶᠢᠮᠴᠤᠭ ᠳ᠋ᠠ | ᠯᠠᠮᠠ ᠶᠡᠭᠡ ᠯᠠ ᠠᠭᠤᠷᠯᠠᠵᠤ᠄ ︿︿ᠴᠢᠨᠤ ᠥᠨᠥ ᠱᠠᠭᠠ ᠨᠠᠭᠠᠳᠤᠭᠠᠳ ᠬᠦᠮᠦᠨ ᠱᠦᠭᠦᠳᠡᠭ ᠤᠬᠠᠭᠠᠨ ᠴᠢᠨᠢ | ᠶᠠᠭᠠᠴᠢᠬᠠᠪᠠ﹀﹀ ᠭᠡᠵᠤ ᠵᠠᠩᠨᠠᠭᠰᠠᠨ ᠭᠡᠨᠡ᠃ | ᠱᠠᠭᠠ ᠶᠢ ᠪᠤᠳᠤᠬᠤ᠂ ᠬᠠᠮᠠᠭᠠᠯᠠᠬᠤ ᠪᠠ ᠨᠠᠭᠠᠳᠤᠮ ᠤᠨ ᠪᠡᠯᠭᠡᠳᠡᠯ | ᠠᠪᠠᠭᠠᠨᠠᠷ ᠨᠤᠲᠤᠭ ᠲᠤ ᠱᠠᠭᠠ ᠨᠢᠰᠠᠯᠵᠤ ᠨᠠᠭᠠᠳᠬᠤ ᠳᠤ ᠵᠠᠪᠠᠯ ᠵᠡᠭᠡᠷᠡ ᠶᠢᠨ ᠱᠠᠭᠠ ᠪᠠᠷ ᠨᠠᠭᠠᠳᠤᠳᠠᠭ᠂ | ᠤᠴᠢᠷ ᠨᠢ ᠵᠡᠭᠡᠷᠡ ᠶᠢᠨ ᠱᠠᠭᠠ ᠦᠵᠡᠬᠦ ᠳᠤ ᠴᠡᠪᠡᠷ ᠴᠡᠮᠴᠡᠭᠡᠷ᠂ ᠭᠤᠸᠠ ᠭᠡᠭᠡᠨᠴᠡᠷ ᠭᠠᠷ ᠲᠤ ᠠᠳᠬᠤᠬᠤ ᠳᠤ | ᠪᠠᠭᠲᠠᠭᠠᠮᠵᠢ ᠰᠠᠶᠢᠲᠠᠢ ᠮᠥᠷᠲᠡᠭᠡᠨ ᠡᠶᠡᠪᠡᠷᠭᠦᠦ ᠲᠠᠭᠠᠯᠠᠮᠵᠢᠲᠠᠢ᠃ ᠨᠢᠰᠠᠯᠬᠤ ᠳᠤ ᠣᠨᠣᠴᠠ ᠰᠠᠶᠢᠲᠠᠢ᠂ ᠰᠣᠨᠤᠰᠬᠤ | ᠳᠤ ᠳᠠᠭᠤᠨ ᠤ ᠥᠩᠭᠡ ᠲᠣᠷᠨᠢᠭᠤᠨ᠂ ᠣᠷᠬᠢᠬᠤ ᠳᠤ ᠲᠣᠰᠣᠯᠲᠠ ᠰᠠᠶᠢᠲᠠᠢ ᠵᠡᠷᠭᠡ ᠣᠨᠴᠠᠯᠢᠭ ᠲᠠᠢ ᠪᠠᠶᠢᠳᠠᠭ᠃ | ᠵᠡᠭᠡᠷᠡ ᠶᠢᠨ ᠱᠠᠭᠠ ᠤᠳᠠᠭᠠᠨ ᠵᠢᠯ ᠪᠣᠯᠣᠭᠰᠠᠨ ᠨᠢ ᠰᠢᠪ ᠰᠢᠷᠠ ᠥᠩᠭᠡᠲᠡᠢ ᠮᠥᠷᠲᠡᠭᠡᠨ ᠮᠣᠷᠢᠨ ᠲᠠᠯᠠ ᠲᠡᠮᠡᠭᠡᠨ | ᠲᠠᠯᠠ ᠨᠢ ᠭᠥᠯᠢᠭᠡᠷ ᠪᠣᠯᠴᠢᠬᠠᠭᠰᠠᠨ ᠪᠠᠶᠢᠳᠠᠭ᠃ ᠨᠠᠰᠤᠲᠠᠶᠢᠴᠤᠤᠯ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ ᠱᠠᠭᠠ ᠶᠢ ᠤᠳᠠᠭᠠᠨ ᠵᠢᠯ | ᠨᠠᠭᠠᠳᠴᠤ᠂ ᠭᠠᠷ ᠤᠨ ᠬᠥᠯᠥᠰᠥ ᠣᠷᠤᠭᠰᠠᠨ ᠠᠴᠠ ᠰᠢᠷᠠ ᠥᠩᠭᠡᠲᠡᠢ ᠪᠣᠯᠣᠯᠠ ᠭᠡᠵᠤ ᠶᠠᠷᠢᠳᠠᠭ᠃ ᠪᠠᠰᠠ | ᠦᠬᠡᠷ ᠤᠨ ᠰᠢᠯᠪᠢᠨ ᠤ ᠶᠠᠰᠤᠨ ᠤ ᠱᠥᠯᠥᠨ ᠳᠤ ᠵᠥᠭᠡᠯᠡᠨ ᠭᠠᠯ ᠢᠶᠠᠷ ᠤᠳᠠᠭᠠᠨ ᠪᠤᠴᠠᠯᠭᠠᠪᠠᠯ ᠰᠢᠷᠠ ᠥᠩᠭᠡᠲᠠᠢ | ᠪᠣᠯᠣᠨᠠ ᠭᠡᠳᠡᠭ᠃ ᠬᠠᠳᠠᠨ ᠤ ᠬᠠᠭ ᠴᠢᠨᠠᠵᠤ ᠪᠣᠯᠭᠤᠭᠰᠠᠨ ᠣᠰᠤᠨ ᠳᠤ ᠨᠢ ᠱᠠᠭᠠ ᠪᠠᠨ ᠪᠤᠴᠠᠯᠭᠠᠪᠠᠯ ᠨᠣᠭᠤᠭᠠᠨ | ᠥᠩᠭᠡᠲᠡᠢ ᠪᠣᠯᠳᠠᠭ ᠭᠡᠨᠡ᠃ ᠱᠠᠭᠠ ᠶᠢ ᠤᠳᠠᠭᠠᠨ ᠵᠢᠯ ᠬᠠᠳᠠᠭᠠᠯᠠᠬᠤ ᠳᠤ ᠵᠠᠪᠠᠯ ᠵᠢᠯ ᠳᠤ ᠬᠡᠳᠦ ᠤᠳᠠᠭᠠ | ᠲᠠᠭᠠᠷᠴᠤᠭ ᠠᠴᠠ ᠨᠢ ᠭᠠᠷᠭᠠᠵᠤ ᠨᠠᠷᠠ ᠰᠠᠯᠬᠢ ᠦᠵᠡᠭᠦᠯᠵᠤ ᠡᠷᠭᠢᠭᠦᠯᠵᠤ ᠤᠷᠪᠠᠭᠤᠯᠵᠤ ᠭᠠᠷ ᠤᠨ ᠬᠥᠯᠥᠰᠥ | ᠤᠷᠤᠭᠤᠯᠵᠤ ᠪᠠᠶᠢᠬᠤ ᠬᠡᠷᠡᠭᠲᠡᠢ᠃ ᠬᠠᠷᠢᠨ ᠴᠢᠬᠢᠭ ᠨᠣᠶᠢᠲᠠᠨ ᠢ ᠬᠠᠮᠢᠶᠠᠷᠬᠤ ᠦᠭᠡᠢ ᠡᠷᠤᠢ ᠬᠤᠷᠤᠢ ᠦᠭᠡᠢ | ᠬᠠᠶᠠᠴᠢᠬᠠᠵᠤ ᠪᠣᠯᠬᠤ ᠦᠭᠡᠢ᠃ ᠨᠡᠩ ᠴᠦ ᠬᠥᠨᠳᠡᠢ ᠬᠠᠨᠳᠠᠢ ᠳᠤ ᠬᠦᠰᠡᠷ ᠬᠠᠶᠠᠴᠢᠬᠠᠵᠤ ᠪᠣᠯᠬᠤ ᠦᠭᠡᠢ᠃ | ᠢᠩᠭᠢᠪᠡᠯ ᠬᠤᠷᠣᠬᠠᠶᠢᠰᠢᠶᠠᠬᠤ ᠠᠶᠤᠯ ᠲᠠᠢ᠂ ᠬᠤᠷᠤᠬᠠᠶᠢᠰᠢᠶᠠᠪᠠᠯ ᠥᠩᠭᠡ ᠵᠢᠪᠠᠷ ᠢᠶᠠᠨ ᠠᠯᠳᠠᠵᠤ ᠠᠳᠡ | ᠲᠡᠨᠳᠡ ᠠᠴᠠ ᠨᠢ ᠬᠤᠩᠬᠤᠶᠢᠵᠤ ᠬᠤᠲᠤᠶᠢᠭᠠᠳ ᠥᠩᠭᠡ ᠦᠵᠡᠮᠵᠢ ᠦᠭᠡᠢ ᠪᠤᠯᠤᠨᠠ᠃ ᠱᠠᠭᠠ ᠨᠢᠰᠠᠯᠬᠤ | ᠳᠤᠮᠳᠠ ᠪᠠᠨ ᠬᠤᠨᠢᠨ ᠠᠴᠠ ᠡᠬᠢᠯᠡᠪᠡᠯ ᠬᠤᠨᠵᠢᠨᠠ᠂ ᠮᠣᠷᠢᠨ ᠠᠴᠠ ᠡᠬᠢᠯᠡᠪᠡᠯ ᠮᠣᠬᠤᠨᠠ᠂ ᠲᠡᠮᠡᠭᠡᠨ ᠠᠴᠠ ᠡᠬᠢᠯᠡᠪᠡᠯ | ᠲᠡᠩᠬᠡᠷᠡᠨᠡ᠂ ᠢᠮᠠᠭᠠᠨ ᠠᠴᠠ ᠡᠬᠢᠯᠡᠪᠡᠯ ᠶᠠᠳᠠᠷᠠᠨᠠ ᠭᠡᠬᠦ ᠪᠣᠶᠣ ᠨᠠᠭᠠᠳᠴᠤ ᠪᠠᠶᠢᠭᠠ ᠬᠤᠶᠠᠷ ᠬᠦᠮᠦᠨ ᠤ ᠨᠢᠭᠡ ᠨᠢ | ᠴᠥᠬᠡᠨ ᠭᠡᠳᠤᠨ ᠱᠠᠭᠠ ᠲᠠᠢ ᠦᠶᠡᠰ ᠵᠢᠱᠢᠶᠡᠯᠡᠪᠡᠯ ᠵᠢᠷᠭᠤᠭᠠᠨ ᠱᠠᠭᠠ ᠲᠠᠢ ᠦᠶᠡᠰ ᠵᠢᠭᠤᠷᠠᠯᠳᠤᠬᠤ ᠶᠢᠨ ᠵᠢᠷᠭᠤᠭᠠ | ᠂ ᠳᠣᠯᠣᠭᠠᠨ ᠱᠠᠭᠠ ᠲᠠᠢ ᠪᠣᠯ ᠳᠣᠷᠣᠶᠢᠲᠠᠬᠤ ᠶᠢᠨ ᠳᠣᠯᠤᠭᠠ᠂ ᠨᠠᠢᠮᠠᠨ ᠱᠠᠭᠠ ᠲᠠᠢ ᠪᠣᠯ ᠨᠠᠭᠠᠰᠢᠯᠠᠬᠤ ᠶᠢᠨ ᠨᠠᠢᠮᠠ | ᠭᠡᠬᠦ ᠵᠡᠷᠭᠡ ᠶᠢᠨ ᠬᠤᠯᠪᠤᠭᠠ ᠬᠤᠷᠰᠢᠶᠠ ᠦᠭᠡ ᠣᠯᠠᠨ ᠪᠠᠶᠢᠳᠠᠭ ᠪᠥᠭᠡᠳ ᠴᠠᠭᠠᠨ ᠰᠠᠷᠠ ᠥᠩᠭᠡᠷᠡᠵᠦ᠂ ᠬᠠᠪᠤᠷ ᠤᠨ | ᠲᠥᠯ ᠲᠣᠰᠬᠤ ᠴᠠᠭ ᠪᠣᠯᠬᠤ ᠦᠶᠡᠰ ᠱᠠᠭᠠ ᠨᠠᠭᠠᠳᠤᠪᠠᠯ ᠮᠠᠶᠢᠭ ᠬᠤᠷᠠᠭᠠ ᠭᠠᠷᠤᠨᠠ ᠭᠡᠵᠤ ᠨᠠᠭᠠᠳᠬᠤ ᠪᠠᠨ | ᠪᠣᠯᠢᠵᠤ᠂ ᠬᠤᠷᠢᠶᠠᠵᠤ ᠲᠠᠯᠪᠢᠳᠠᠭ᠃ | ᠶᠡᠷᠦᠩᠬᠡᠢ ᠪᠠᠶᠢᠳᠠᠯ ᠠᠴᠠ ᠨᠢ ᠠᠪᠴᠤ ᠦᠵᠡᠬᠦ ᠳᠤ᠄ ᠠᠪᠠᠭᠠᠨᠠᠷ ᠨᠤᠲᠤᠭ ᠤᠨ ᠱᠠᠭᠠ ᠶᠢᠨ ᠰᠤᠶᠤᠯ | ᠠᠭᠤᠯᠭᠠ ᠥᠷᠭᠡᠨ ᠳᠡᠯᠭᠡᠷ ᠪᠥᠭᠡᠳ ᠪᠣᠰᠤᠳ ᠭᠠᠵᠠᠷ ᠣᠷᠣᠨ ᠤ ᠱᠠᠭᠠ ᠶᠢᠨ ᠰᠤᠶᠤᠯ ᠠᠴᠠ ᠬᠤᠵᠢᠮᠳᠠᠬᠤ ᠦᠭᠡᠢ | ᠮᠥᠷᠲᠡᠭᠡᠨ ᠣᠬᠢ ᠰᠢᠯᠢᠳᠡᠭ ᠵᠤᠶᠢᠯ ᠤᠳ ᠴᠦ ᠣᠯᠠᠨ ᠪᠠᠶᠢᠨᠠ ᠭᠡᠳᠡᠭ ᠢ ᠮᠡᠳᠡᠷᠡᠬᠦ ᠶᠢᠨ ᠬᠠᠮᠲᠤ ᠵᠠᠬᠠ ᠵᠤᠬᠠ ᠠᠴᠠ | ᠨᠢ ᠪᠠᠭᠠ ᠰᠠᠭᠠ ᠲᠠᠨᠢᠯᠴᠠᠭᠤᠯᠤᠯᠠ᠃ | ᠲᠠᠶᠢᠯᠪᠤᠷᠢ ①ᠮᠥᠩᠬᠦᠵᠢᠬᠦ — ᠮᠥᠩᠬᠦ ᠲᠠᠢ ᠪᠣᠯᠬᠤ᠃ ②ᠪᠥᠩᠵᠢᠭ — ᠬᠤᠶᠠᠷ ᠱᠠᠭᠠ | ᠣᠷᠬᠢᠬᠤ ᠶᠢ ᠪᠥᠩᠵᠢᠭ ᠭᠡᠳᠡᠭ᠃ ③ᠵᠠᠩᠭᠠᠵᠤ — ᠡᠷᠡᠭᠡᠯᠵᠡᠵᠤ ᠲᠠᠲᠠᠭᠠᠯᠵᠠᠵᠤ᠃ ④ᠬᠥᠨᠳᠡᠬᠦ — | ᠢᠵᠢᠯ ᠬᠤᠶᠡᠷ ᠱᠠᠭᠠ ᠶᠢ ᠨᠢᠰᠠᠯᠬᠤ ᠭᠡᠵᠤ ᠪᠠᠶᠢᠭᠠᠳ ᠬᠠᠵᠠᠭᠤ ᠳᠤᠨᠢ ᠪᠠᠶᠢᠭᠰᠠᠨ ᠥᠭᠡᠷᠡ ᠨᠢᠭᠡ ᠱᠠᠭᠠ ᠳᠤ | ᠰᠠᠨᠠᠮᠰᠠᠷ ᠦᠭᠡᠢ ᠭᠠᠷ ᠬᠦᠷᠬᠦ᠃ ⑤ ᠬᠥᠨᠳᠡᠭᠡ — ᠬᠤᠶᠠᠷ ᠪᠤᠶᠤ ᠬᠤᠶᠠᠷ ᠠᠴᠠ ᠳᠡᠭᠡᠭᠰᠢ ᠱᠠᠭᠠ ᠨᠢᠭᠡ | ᠳᠤᠤᠷᠠ ᠨᠠᠭᠠᠯᠳᠤᠵᠤ ᠣᠪᠤᠭᠠᠷᠠᠭᠰᠠᠨ ᠢ ᠬᠡᠯᠡᠨᠡ᠃ |